தடைசெய்யப்பட்ட LTTE அமைப்பை மகிமைப்படுத்தும் வகையில் பாடல்கள் மற்றும் காணொளிகளைத் திருத்தி சமூக ஊடகங்களில் பரப்பியதாக குற்றம் சாட்டப்பட்டு ஒருவர் கைது செய்யப்பட்ட சம்பவம் தொடர்பில் சமூக ஊடகங்களில் பரவி வரும் தவறான தகவல்களுக்கு இலங்கை பொலிஸார் விளக்கம் அளித்துள்ளனர்.

சமூக ஊடகங்களில் சிலர் பரப்பி வரும் தகவல்களுக்கு மாறாக, நாட்டில் இசை நிகழ்ச்சிகளை நடத்துவதற்கோ அல்லது பொழுதுபோக்கு நிகழ்ச்சிகளில் இசை நிகழ்த்துவதற்கோ எந்தவிதமான பொதுத் தடையும் விதிக்கப்படவில்லை என்று பொலிஸார் தெளிவுபடுத்தியுள்ளனர்.

இந்த விளக்கம், கிளிநொச்சி மாவட்டத்தின் உதயநகர் பகுதியைச் சேர்ந்த 24 வயதுடைய இளைஞர் ஒருவர் கைது செய்யப்பட்டதைத் தொடர்ந்து வெளியிடப்பட்டுள்ளது.

பொலிஸார் தெரிவித்ததன்படி, கடந்த மே 31ஆம் தேதி சாவகச்சேரி நாவற்குழி பகுதியில் நடைபெற்ற இசை நிகழ்ச்சியில் பாடப்பட்ட இரண்டு பாடல்களை குறித்த இளைஞர் பின்னர் தொகுத்து (Edit செய்து) தனது சமூக ஊடக கணக்குகளில் பதிவேற்றியுள்ளார்.

யாழ்ப்பாண பிராந்திய குற்றப் புலனாய்வு பிரிவு மேற்கொண்ட விசாரணைகளில், அந்தக் காணொளிகள் தடைசெய்யப்பட்ட LTTE அமைப்பை மகிமைப்படுத்தும் வகையில் மாற்றியமைக்கப்பட்டிருந்ததுடன், இணையத்தில் பரவச் செய்யும் நோக்கில் அமைப்புக்கு ஆதரவான உள்ளடக்கங்களும் இணைக்கப்பட்டிருந்ததாகக் கண்டறியப்பட்டுள்ளதாக பொலிஸார் தெரிவித்துள்ளனர்.

இதனையடுத்து, சந்தேகநபர் ஜூன் 2ஆம் தேதி கைது செய்யப்பட்டார். பின்னர் அவர் 1979ஆம் ஆண்டின் பயங்கரவாதத் தடுப்புச் சட்டம் (PTA) இலக்கம் 48 இன் பிரிவு 3(G) கீழ் 2026 ஜூன் 3ஆம் தேதி சாவகச்சேரி நீதவான் நீதிமன்றத்தில் முன்னிலைப்படுத்தப்பட்டார்.

வழக்கை விசாரித்த நீதிமன்றம், சந்தேகநபரை ஜூன் 17ஆம் தேதி வரை விளக்கமறியலில் வைக்க உத்தரவிட்டுள்ளது.

இதேவேளை, நாட்டின் அரசியலமைப்புக்கும் நடைமுறையிலுள்ள சட்டங்களுக்கும் அமைவாக பொதுமக்கள் செயற்பட வேண்டும் என்றும், சமூக ஊடகங்களில் பரவும் உறுதிப்படுத்தப்படாத தகவல்களை நம்பி தவறாக வழிநடத்தப்பட வேண்டாம் என்றும் இலங்கை பொலிஸார் மீண்டும் வலியுறுத்தியுள்ளனர்.

— Nervizhi News Network